孤單係一種幾複雜嘅感受。

- 孤單可能係：同親密伴侶長期有關係問題，彼此嘅隔膜，例如大家都係同一間屋，但係冇偈傾，令到有對方比冇對方更加慘，當中感受失望或者憤怒。

- 孤單可能係：曾經擁有一段關係，但係因為伴侶嘅離開或者大家分開，自己一個，傷口亦未痊愈，有一種哀傷同失落。

- 孤單可能係：見到「街裏愛人一對對」，然後對比所謂嘅「一般人」而覺得自己一個好似好「奇怪」，有羞恥嘅感覺。

- 孤單可能係：覺得自己唔好，以致唔敢同人哋接觸，好怕俾人發現真實嘅自己，背後有一份恐懼。

- 孤單可能係：你嘗試去接觸其他人，但係好似冇人理會你，比回應你，你覺得灰心。

- 孤單可能係：長期缺乏社交技巧，唔知點同人哋開展話題、接觸同埋相處，當中覺得又尷尬又無助。

- 孤單可能係：覺得其他人總係唔好信，或者會傷害自己，所以會刻意推開別人。

我舉咁多個例子，就係想提出孤單並唔係咁「簡單」，唔係單單「搵個人陪啦」就可以搞掂。另外，我哋每個人唔多唔少都經歷過，你唔係自己一個人孤單。

大時大節，當孤單感覺浮現，或者呢個係一個機會，讓我哋認識自己，「心理自瞭」！